अहिलेको गठबन्धन एमालेलाई हराउन बनेको हो : वाईसीएल इन्चार्ज दिपशिखा

धादिङ,२८ चैत।
वाईसीएल नेपालका इन्चार्ज राम प्रसाद सापकोटा (दिपशिखा) ले अहिलेको गठबन्धन एमालेलाई हराउन बनेको बताउनुभएको छ।

गठबन्धनका उम्मेदवार जुन पार्टीका हुन् वाईसीएलले नचिन्ने भन्दै दिपशिखाले गठबन्धनलाई जिताएर विजयी उत्सवमा सहभागि हुने बताउनुभएको छ।सोमबार धादिङबेशीमा वाईसीएल धादिङको नीलकण्ठ नगर सम्मेलन उद्घाटन गर्दै दिपशिखाले हिजो माओवादी जिताउन लागेको वाईसीएल अब सत्ता गठबन्धनका उम्मेदवार जिताउन लाग्नु पर्ने बताउनुभयो।

नेकपा माओवादी केन्द्रका केन्द्रीय सदस्य समेत रहेका दिपशिखाले अबको एक महिना नसुत्ने, नथाक्ने र नझुक्ने प्रतिवद्धताका साथ चुनावी प्रचारमा लाग्न समेत निर्देशन दिनुभएको छ।

बैशाख ३१ पछि स्थानीय तहमा कांग्रेस पहिलो पार्टीर माओवादी दोस्रो पार्टी बन्ने दावी गर्दै उनले एमालेको अबको स्थान चौथो हुने बताउनुभयो। हामी संविधानका रक्षकहरुको गठबन्धन भएकोले एमाले अतालिएको छ, जव मान्छे डराउँछ तव चिच्याउँछ यति बेला केपी वली र उनका कार्यकर्ता चिच्याउन थालेको र वर्वराउन थालेको बताउँदै गठबन्धनका कार्यकर्ताहरु माथि कतै धावा बोल्ने चेष्टा भयो भने वाईसीएल जागै रहेको बताउनुभयो।

देशभर गठबन्धनले एउटा मापदण्ड बनाएको छ, गठबन्धनका दलका उम्मेदवारहरुले ०७४ मा जुन जुन पालिका र वडामा जितेका थिए ति ठाउँहरुमा त्यहि दलका उम्मेदवार हुन्छन् भने एमालेले जितेका ठाउँहरु बाड्ने हो । बाड्ने क्रममा कथम कदाचित कतै मिल्न सकेन भने सिङ्गल सिङ्गल लड्ने हो तर गठबन्धनका दलहरु गठबन्धन बाहिर गएर तालमेल गर्न नपाईने दिपशिखाले बताउनुभयो।

बाईसीएल नीलकण्ठ नगर अधिवेशनमा माओवादी केन्द्र बागमती प्रदेशका सह सचिव, दलबहादुर बुर्लाकोटी, वाईसीएलका केन्द्रीय अध्यक्ष सुमन देवकोटा, माओवादी केन्द्र धादिङका अध्यक्ष मनराज भण्डारी लगायतको आतिथ्यता रहेको थियो।