धादिङको नीलकण्ठ–८ को वडा कार्यालयमा कुमाल समुदायले लगाए ताला

धादिङ,३२ असार।
धादिङको नीलकण्ठ नगरपालिका वडा नम्बर ८ को वडा कार्यालयमा कुमाल समुदायले ताला लगाएका छन् । बजेट विनियोजनमा असन्तुष्टि जनाउदै शनिबार कुमाल समुदायले ताला लगाएका हुन् ।

कुमाल संग्राहलय निर्माणको लागि बजेट नछुट्याइएको, खानेपानी आयोजना निर्माणमा वेवास्ता गरि वडा अध्यक्षले कुमाल समुदायको मागलाई वेवास्ता गरेका कारण वडा कार्यालयमा ताला लगाएको कुमाल समाजका केन्द्रिय महासचिव ठाकुर कुमालले बताउनुभयो ।

वडामा आएको बजेटको विषयमा कुमाल समुदायलाई नसमेटि एकलौटी ढंगले बजेट विनियोजन भएकाले समुदायको नेतृत्व गर्दै ताला लगाइएको उहाँको भनाई छ । माग सम्बोधन नभएसम्म ताला नखोल्ने पनि उहाँले बताउनुभयो ।

यता वडा अध्यक्ष प्रकाश श्रेष्ठले भने कुमाल समुदायले उठाएका मागहरु सम्बोधन हुने बताउनुभएको छ । उहाँले योजनाहरु नगरपालिकाको रातो किताबमा नआउँदै ताला लगाउनुभएकाले छलफलबाट समस्याको समाधान गर्ने वडा अध्यक्ष श्रेष्ठको भनाई छ।