धादिङ जिल्ला सहकारी संघ द्धारा सहकारी बजार संचालन

धादिङ । धादिङ जिल्ला सहकारी संघले धादिङबेशीमा सहकारी बजार संचालन ल्याएको छ । आज एक कार्यक्रमको बिच राष्ट्रिय सहकारी महासंघका अध्यक्ष मिनराज कडेंलले उद्घाटन गरे संगै सहकारी बजार संचालनमा आएको हो ।

किसानले उत्पादन गरेका फलफूल, तरकारी र दूधजन्य वस्तुको विक्री मूल्य र उपभोक्ताले उपभोग गर्ने मूल्य बिचको अन्तर कम गराउने उदेश्यका साथ आज बाट सहकारी बजार संचालनमा आएको छ । धादिङको १३ वटै पालिकाभित्र उत्पादन भएको फलफूल, तरकारी र दूधजन्य वस्तुको सहकारी बजारबाट बिक्रि गरिनुको साथै अन्य ठाउँमा पनि बजारिकरणको लागि सहजीकरण गर्ने योजना रहेको धादिङ जिल्ला सहकारी संघका अध्यक्ष रामचन्द्र आचार्यले बताउनुभएको छ । उहाँले धादिङको विभिन्न पालिकाको ठाउँ विशेष उत्पादनहरुको चिनारी दिनुको साथै बजारिकरण गर्ने लक्ष्यको साथ सहकारी बजारको प्रारम्भ गरिएको बताउनु भएको हो । अध्यक्ष आचार्यले बजार उद्घाटन सम्म आउंदा बिभिन्न आरोह अवरोह पार गरेको भन्दै सहयोगी सरोकारवाला सवैलाई धन्यवाद समेत प्रकट गर्नु भएको छ ।

कार्यक्रमका प्रमुख अतिथि तथा राष्ट्रिय सहकारी महासंघका अध्यक्ष मिनराज कँडेलले सहकारी बजारको उद्घाटन गर्दै सहकारी बजार संचालनले कृषक र उपभोक्ता बीच विचौलियाको अन्त्य हुनुको साथै कृषकको आयस्तरमा पनि बृद्धि हुने बताउनु भएको छ ।

उद्घाटन समारोहमा जिल्ला समन्वय समितिका प्रमुख नवराज अधिकारी, नीलकण्ठ नगरपालिकाका उप प्रमुख दिपक बिश्वकर्मा,उद्योग बाणिज्य संघका अध्यक्ष बिष्णु प्रसाद थपलिया, बिषयगत सहकारी संघका प्रमुख तथा प्रतिनिधिहरु, नागरिक अगुवा, जिल्लामा क्रियाशिल संचारकर्मीहरुको उपस्थिति रहेको थियो ।

धादिङ जिल्ला सहकारी संघले आज नै संस्थाको २२ औ बार्षिक साधारण सभा समेत सम्पन्न गरेको छ ।साधारण सभाले बिधान संसोधन सहितका बिभिन्न निति तथा कार्यक्रमहरु सर्वसहमत पास गरेको छ ।