जिल्ला प्रशासन कार्यालय धादिङ र सामी कार्यक्रमबीच अन्तरक्रिया कार्यक्रम सम्पन्न

धादिङ,१५ चैत
नीलकण्ठ नगरपालिकाद्वारा सञ्चालित सुरक्षित आप्रवासन कार्यक्रम र जिल्ला प्रशासन कार्यालयबीच अन्तरक्रिया कार्यक्रम सम्पन्न भएको छ । सुरक्षित आप्रवासन कार्यक्रमले जिल्लामा गरेको कामको समिक्षा तथा आगामी कार्ययोजनाको विषयमा जानकारी गराउने उदेश्यले अन्तरक्रिया कार्यक्रम सन्चालन गरीएको सामी कार्यक्रमका सामाजिक परिचालन अधिकृत सम्झना भण्डारीले जानकारी दिनुभएको छ ।

प्रमुख जिल्ला अधिकारी रमेश ढकालको अध्यक्षतामा सम्पन्न भएको कार्यक्रममा जिल्ला प्रहरी कार्यालय धादिङका प्रमुख गौतम मिश्र,नीलकण्ठ नगरपालिकाका प्रमुख प्रशासकीय अधिकृत दिनेशराज पन्त,नीलकण्ठ नगरपालिकाका सल्लाहकार दीपक कोईराला लगायत जिल्ला प्रशासन कार्यालयका कर्मचारी र सामी कार्यक्रमका कर्मचारीहरुको सहभागिता रहेको थियो ।सामी कार्यक्रमका कार्यक्रम संयोजक दिनेश दुवाडीले सामी कार्यक्रमले गरीरहेको अहिले सम्मको कामको कार्य वितवरण र आगामी योजनाहरुको बारेमा जानकारी गराउनु भएको थियो ।

सिप,सुचना,न्याय,वित्तिय साक्षरता तथा मनोसामाजिक परामर्शको क्षेत्रमा भएको काम र जिल्ला प्रशासन कार्यालय र जिल्ला प्रहरी कार्यालयसँग कसरी समन्वय गरेर काम गर्न सकिन्छ भन्ने विषयमा छलफल भएको थियो।कार्यक्रममा प्रमुख जिल्ला अधिकारी रमेश ढकालले सामी कार्यक्रमसँग समन्वय गरेर काम गर्ने बताउनु भयो ।बैदेशिक रोजगारको क्षेत्रलाई सुरक्षित,मर्यादित तथा भरपर्दो बनाउने काममा सबैसँग हातेमालो गरेर अघि बढ्नुपर्ने बताउनुभयो। सामीको धादिङ जिल्लाको टिम कुशल रहेको भन्दै सँगै मिलेर काम गर्ने बताउनुभयो ।

यसैगरी प्रहरी प्रमुख गौतम मिश्रले ठगी लगायतको अन्य मुद्धामा सामी कार्यक्रम सँग समन्वय गरेर न्याय दिलाउने काममा प्रहरीले सहयोग गर्ने बताउनुभयो।यसैगरी नीलकण्ठ नगरपालिकाका प्रमुख प्रशासकीय अधिकृत दिनेशराज पन्तले सामी कार्यक्रम प्रभावकारी भएको भन्दै गाउँका नागरिकहरुलाई सुचनामा पहुँच पुर्याउने काम गरीरहेको बताउनुभयो ।सहि सुचना तथा परामर्श नलिदा नागरिकहरु ठगीरहेको भन्दै सुचनामा पहुँच तथा न्याय दिलाउने काममा सामी कार्यक्रमले सहजीकरण गरीरहेको बताउनुभयो । जिल्लाको नीलकण्ठ नगरपालिका,गंगाजमुना गाउँपालिका,धुनिवेशी नगरपालिका र थाक्रे गाउँपालिकामा सामी कार्यक्रम सन्चालनमा रहेको छ ।