शिक्षक र स्थानिय सरकार बिच नङ्ग र मासुको जस्तो सम्बन्ध हुनुपर्छ :  मेयर ढुंगाना

धादिङ,२८ असोज
शिक्षक र स्थानिय सरकार बिच नङ्ग र मासुको जस्तो सम्बन्ध हुनुपर्ने नीलकण्ठ नगरपालिकाका मेयर भीम प्रसाद ढुंगानाले बताउनु भएको छ । शिक्षकहरुको माग प्रति आफ्नो पुर्ण सहयोग रहने भन्दै ढुंगानाले स्थानिय सरकार मातहत बस्दिन भन्ने कुरा चाहि संविधान विपरित रहेको स्पष्ट पार्नुभएको छ । शिक्षक हित बचत तथा ऋण सहकारी संस्थाको ११ औँ वार्षिक साधारण सभालाई सम्धोन गर्नुहुदै आज ढुंगानाले सो कुरा बताउनु भएको हो ।

शिक्षकहरुको सेवा,सुविधाहरु बढाउनुपर्ने कुरा आफुले प्रधानमन्त्री तथा मन्त्रीहरुको भेटघाटमा उठाएको भन्दै उहाँले अनुदानका शिक्षकहरुको विषयमा भने कुनै पनि संघ संगठनले मुद्दा नउठाएको प्रति गुनासो गर्नुभयो । स्थानिय सरकार र शिक्षकहरु बिच सहकार्य भए मात्रै शिक्षाको गुणस्तर बढ्ने भन्दै उहाँले संविधान संशोधन गरेर भएपनि शिक्षकहरुमो माग सम्बोधन हुने कुरा सम्भव नभएको बताउनु भएको छ । नीलकण्ठ नगरपालिकाले शिक्षा क्षेत्रमा सबैभन्दा बढी बजेट बिनियोजन गरेको भन्दै शिक्षाको गुणस्तर बढाउनको लागि शिक्षकलाई अनुदानमा ल्यापटप,विद्यालयहरुलाई स्मार्ट टिभी वितरण गरेको स्पष्ट पार्नुभयो ।

शिक्षक हित बचत तथा ऋण सहकारी संस्थाका अध्यक्ष दिपक सिंखडाको अध्यक्षता र नगर प्रमुख भीम प्रसाद ढुंगानाको प्रमुख आतिथ्यतामा संस्थाको बार्षिक साधरण सभा सम्पन्न भएको हो । साधारण सभा कार्यक्रममा संस्थाका अध्यक्ष दिपक सिंखडाले सहकारीको गतिविधिहरुको विषयमा जानकारी गराउनुभएको थियो ।

त्यसैगरी संस्थाका सचिव जनार्दन नेपालले प्रगति प्रविदेन तथा कोषाध्यक्ष सावित्रा पौडेलले आर्थिक प्रतिवेदन प्रस्तुत गर्नुभएको थियो । सहकारीको वार्षिक साधारण सभाको अवसरमा संस्थापक शेयर सदस्यहरु चिरन्जीवी अधिकारी, पुरुषोत्तम रेग्मी, जंग बहादुर तामाङ, अम्बिका सिटौला र रामकृष्ण मानन्धरलाइ सम्मान गरिएको थियो ।

त्यसैगरी सहकारीमा सबै भन्दा बढी शेयर खरिद गर्ने, उच्च बचतकर्ता, असल शेयर सदस्य र १० जना भन्दा बढी सदस्य बनाउने शेयर सदस्यहरुलाई समेत सम्मान गरिएको थियो ।धादिङ जिल्ला भर कार्यक्षेत्र रहेको शिक्षक हित बचत तथा ऋण सहकारी संस्थाको कुल चुक्ता शेयर पुजी १९ लाख ५५ हजार ५०० रहेको छ भने कुल बचत संकलन १ करोड ४ लाख १९ हजार ७४४ रहेको छ ।