अन्धोपन हुने समस्या न्युनीकरण गर्न स्वास्थ्य स्वयमसेविकालाई तालिम

धादिङ,१० मंसिर
आँखामा हुने समस्या कम गर्ने उदेश्यले सामुदायिक स्वास्थ्य स्वयंमसेविकालाई तालिम प्रदान गरीएको छ । तिलगंगा आँखा प्रतिष्ठान धादिङको आयोजनामा सम्पन्न भएको तालिममा नीलकण्ठ नगरपालिका भित्रका १० जना स्वास्थ्यकर्मी र ६३ जना स्वास्थ्य स्वयंमसेविकाहरु गरी ७३ जनाको सहभागिता रहेको थियो । यसअघि तालिम लिईसकेकाहरुलाई पुनर्ताजगी तालिम सन्चालन गरीएको हो । आँखाको प्राथमिक उपचार नपाएर आँखा नै गुम्ने तथा गम्भीर अवस्थामा अस्पताल पुग्ने दरलाई कम गर्ने उद्धेश्यले समुदायका महिला स्वास्थ्य स्वयमंसेविकाहरुलाई तालिम प्रदान गरीएको प्रशिक्षक बिमल पौडेलले बताउनुभयो ।

तालिममा कर्नियामा फुलो परि हुने अन्धोपन रोकथामको उपाय,अन्धोपनका समस्या र यसका समाधान बारे थप उपचार गर्ने, समयमै अन्धोपन निवारणका लागि आवश्यक पर्ने प्रचार प्रसार बारे जानकारी गराउन तालिमको आयोजना गरिएको तिलगंगा आँखा प्रतिष्ठान धादिङका प्रमुख रामसिंह तामाङले जानकारी दिनुभयो । दुई दिन सम्म सन्चालन भएको तालिम आज सकिएको हो ।

तालिम पश्चात समुदायमा आँखाका समस्या भएका नागरिकहरुलाई सेवा प्रवाह गर्न सहज हुने नीलकण्ठ नगरपालिका वडा नम्बर ११ की कमला श्रेष्ठले बताउनुभयो।तिलगंगा आँखा प्रतिष्ठान धादिङले २०१९ देखि महिला स्वास्थ्य स्वयंसेविकाहरुलाई ६÷६ महिनामा आँखा सम्बन्धि प्राथमिक उपचार तालिम प्रदान गर्दै आएको छ ।पछिल्लो ६ महिनाको अविधमा नीलकण्ठ नगरपालिकाका विभिन्न स्थानका महिला स्वास्थ्य स्वयंसेविकाहरुबाट ११ सय २० जाले सेवा लिएका छन् ।