ज्वालामुखीसँग कृषि क्षेत्रमा सहकार्य गर्न सकिन्छः मेयर ढुंगाना

धादिङ,१५ पुस ।
ज्वालामुखी गाउँपालिकासँग कृषिमा सहकार्य गर्न सकिने नीलकण्ठ नगरपालिकाका मेयर भीम प्रसाद ढुंगानाले बताउनुभएको छ । स्थानपति कृषि तथा पशुपालन सहकारीको बार्षिक साधारण सभालाई सम्बोधन गर्नुहुदै नीलकण्ठ नगरपालिकाले ज्वालामुखीका कृषकहरुलाई सहयोग गर्न सकिने बताउनुभयो । कृषि उपजहरु राख्ने शित भण्डारण नहुँदा कृषकहरुले उचित मुल्य पाउन नसकेको भन्दै ढुंगानाले नीलकण्ठ नगरपालिकाले निर्माण गर्न लागेको शित भण्डारणमा ज्वालामुखी गाउँपालिकाका कृषकहरुले उत्पादन गरेको कृषि उपजहरु राख्न दिने वातावरण बनाउने बताउनुभयो ।

दुरीका हिसाबले पनि नीलकण्ठ नगरपालिका नजिक रहेको भन्दै उहाँले ज्वालामुखी गाउँपालिकाका कृषकहरुको लागि पनि शित भण्डारण उपलब्ध गराउने प्रतिबद्धता व्यक्त गर्नुभयो । यसैगरी नीलकण्ठ नगरपालिकाले कृषि क्षेत्रको लागि ८० करोड भन्दा बढीको आयोजना गर्न लागिरहेको भन्दै उहाँले बीउ बैंकबाट उत्पादन भएको बिउबिजनहरु पनि सहुलियत रुपमा उपलब्ध गराउने बताउनुभयो । कृषि क्षेत्रलाई पहिलो प्राथमिकता दिएर सम्मानित पेशा बनाउन सके विदेश पलायन रोक्न सकिने भन्दै उहँले कृषकहरुलाई हरेस नखानको लागि आग्रह गर्नुभयो । नीलकण्ठ नगरपालिकाले कृषि सडक, सिंचाई,शित भण्डारण निर्माण,बीउ बैंक स्थापना लगायत तालिम तथा कृषि यन्त्र वितरण गर्न गरी अमेरीकी सरकारसँगको साझेदारीमा कार्यक्रम सन्चालन गर्न लागीएको ढुंगानाले बताउनुभयो ।

सहकारीका अध्यक्ष दिपक ईटनीको अध्यक्षतामा सम्पन्न भएको कार्यक्रममा नगर प्रमुुख भीम प्रसाद ढुंगानाको प्रमुख आतिथ्यता रहेको थियो । कार्यक्रममा नेपाल नगरपालिका संघका सल्लाहकार तथा बरिष्ठ पत्रकार सरोज अधिकारी,युवा नेता तथा नीलकण्ठ नगरपालिकाका सल्लाहकार दिपक कोईरालाको विशेष आतिथ्यता रहेको थियो । कार्यक्रममा वडा नम्बर १ का वडा अध्यक्ष,जनप्रतिनिधिहरु,नागरिक समाजका प्रमुखहरु,विद्यालयका प्रधानाध्यापक लगायतको आतिथ्यता रहेको थियो । वि.स.२०७३ सालमा स्थापना भएको संस्थाको कुल पुँजी ३५ लाख ४० हजार ६ सय रहेको छ । कुल १३ हजार ५ सय शेयर सदस्य रहेको उक्त संस्थाको कार्य क्षेत्र ज्वालामुखी,नीलकण्ठ,सिद्धलेक र नेत्रावती डबजोङ गाउँपालिका रहेको छ । कार्यक्रममा संस्थाका अध्यक्ष दिपक ईटनी,सचिव,कोषाध्यक्ष लगायतले आ आफ्नो प्रतिवेदन प्रस्तुत गर्नुभएको थियो ।