नवौँ धादिङ महोत्सव माघ १० गतेदेखि गलौदीमा हुँदै

धादिङबेशी । नवौँ धादिङ महोत्सव माघ १० गतेदेखि २१ गते हुने भएको छ । धादिङ उद्योग वाणिज्य संघको आयोजनामा धादिङको गजुरी गाउँपालिका– ५ गलौदीस्थित त्रिशूली किनारमा महोत्सव हुने भएको हो ।

शुक्रबार धादिङ उद्योग बाणिज्य संघले पत्रकार सम्मेलनको गरेर महोत्सवको तयारीको बिषयमा जानकारी गराएको हो । ‘धादिङको दिगो विकास र अर्थतन्त्रको आधार, कृषि, जलस्रोत, पर्यटन तथा उद्योगको पूर्वाधार’ भन्ने मूल नारासहित स्थानिय उत्पादनलाई प्रोत्साहन गर्ने उदेश्यले महोत्सवको आयोजना गरिएको संघका अध्यक्ष बिष्णु  थपलियाले बताउनु भयो ।

महोत्सवमा १ सय ५० वटा स्टल रहने र त्यसमध्ये ५० वटा स्टलहरू जिल्लाभित्रका स्थानिय उत्पादन, सेवा र वस्तुहरूको पहिचान झल्कने गरी १३ वटै स्थानीय तहसँगको सहकार्यमा निःशुल्क बितरण गर्न लागीएको अध्यक्ष थपलियाले पत्रकार सम्मेलनमा बताउनु भयो ।

महोत्सवको आम्दानीबाट संघको संस्थागत विकासमा ठोस योगदान पुगोस् भन्ने उद्देश्यका साथ पुस्तकालय सहितको सूचना केन्द्र र सुविधा सम्पन्न सभाहल निर्माणको योजना रहेको समेत उहाँले बताउनु भयो । उहाँले मेला सफल बताउन बिभिन्न समितिहरु समेत निर्माण गरि काम सुरु भएको जानकारी दिनुभयो ।