धादिङबेशीमा राष्ट्रसेवक कर्मचारीहरुलाई तनाव व्यवस्थापन तालिम

धादिङबेशी । राष्ट्रसेवक कर्मचारीहरुलाई आयोजना गरिएको तनाव व्यवस्थापन तालिम धादिङबेशीमा सम्पन्न भएको छ । जिल्ला आयुर्वेद स्वास्थ्य केन्द्र धादिङको आयोजनामा सोमबारबाट सुरु भएको तालिम बिहिबार सम्पन्न भएको हो ।

मेरो स्वास्थ्य मेरो जिम्मेवारी भन्ने मूल मर्मका साथ सरकारी कार्यालयमा सेवा चुस्त बनाउन र कर्मचारीको स्वास्थ्य अवस्थालाई मध्यनजर गरी तालिम आयोजना गरेको हो ।
उक्त तालिम उत्साह र अर्थपूर्ण रहेको सहभागीहरुले बताएका छन् । कर्मचारीको स्वास्थ्य अवस्थामा सकरात्मक प्रभाव पारेको धादिङका सहायक प्रमुख जिल्ला अधिकारी हुमनाथ पराजुलीले बताउनुभयो ।

तनाव व्यवस्थापनले कार्यालयको सेवा प्रवाहमा सहयोग पुर्याउने उद्देश्यले योग, ध्यान र प्रवचनसहितको चार दिने प्रशिक्षण कार्यक्रम सुरु गरिएको जिल्ला आयुर्वेद स्वास्थ्य केन्द्र धादिङका कार्यालय प्रमुख डाक्टर अमुल्य दाहालले बताउनुभयो । आयुर्वेद पद्धतिबाट तनाव व्यवस्थापन गर्ने तौर तरिकाहरुको बारेमा सिकाइएको उहाँले बताउनुभयो ।

कर्मचारीको स्वास्थ्य अवस्थामा सुधारसँगै कार्यालयले दिने सेवा प्रवाहमा पनि थप प्रभावकारी बन्ने अपेक्षा रहेको उहाँले भन्नुभयो । चारदिनसम्म सञ्चालन रहेको तनाव व्यवस्थापन तालिममा डाक्टर अमुल्य दाहाल र आनन्द गैह्रेले तनाव व्यवस्थापन सम्बन्धि प्रशिक्षण गर्नुभएको थियो । तालिममा धादिङमा रहेका सरकारी कार्यालयका कर्मचारीहरुको सहभागिता रहेको थियो ।