गंगाजमुना–५ फुलखर्क लगायत छुट्टाछुट्टै ४ स्थानमा बचत तथा ऋण व्यवस्थापन तालिम

धादिङबेशी । गंगाजमुना गाउँपालिका वडा नं ५ लगायत वडा नं ३ को गुम्दी,वडा नम्बर ७ को बुढाथुममा गरी छुट्टाछुट्टै स्थानमा बचत तथा ऋण व्यवस्थापन तालिम शुक्रबारबाट शुरु भएको छ । यसै गरी खनियावास गाउँपालिका वडा नं ४ चौकीमा पनि शुक्रबारबाट नै बचत तथा ऋण व्यवस्थापन तालिम शुरु भएको छ ।

गंगाजमुना गाउँपालिका वडा नं ७ बुढाथुममा भएको तालिम उद्घघाटन सत्रमा वडा अध्यक्ष रविन अधिकारी, फुलखर्कमा वडा नम्बर ५ का वडाध्यक्ष कुमार अधिकारी ,वडा नं ३ गुरुङ गाउँमा कार्यपालिका सदस्य उजेली माया गुरुङ र प्रयास नेपाल धादिङका कार्यकारी निर्देशक दामोदर अर्याल तथा खनियाबास चौकीको भएको तालिम उद्घाटन सत्रमा निमित्त प्रमुख प्रशासकीय अधिकृत नवराज श्रेष्ठको उपस्थिति रहेको लक्ष्मी सुनारले जानकारी दिनु भयो ।

दुई दिने तालिममा खनियावसमा १८ जना , फुलखर्कमा २९ जना, गुम्दीमा २४ जना र बुढाथुममा १८ गरी ८९ जनाको सहभागीता रहेको छ ।
प्रयास नेपाल धादिङले आड्रा नेपालको साझेदारी तथा खनियावास र गंगाजमुना गाउँपालिकाको समन्वयमा संचालनमा भएको उत्थानशील जिविकोपार्जन तथा खाद्य सुरक्षा सुढृढिकरण परियोजना कार्यक्रम अन्तरगत गठित समुहका पदाधिकारीहरुको लागि दुई दिने बचत तथा ऋण व्यवस्थापन तालिम संचालन गरिएको हो ।

तालिममा समुहमा बचतको महत्व, बचत संकलन, आम्दानी र खर्च अभिलेख, ऋण लगानी, पासबुक, बचत तथा ऋण परिचालन सम्बन्धि निति, नियम, समुहका पदाधिकारीहरुको काम, कर्तव्य, अधिकार, घुम्ती कोष परिचालन र पुर्व सहकारी शिक्षा लगायतका बिषयमा सहजकर्ताहरु सन्तोष सत्याल,शिव भण्डारी, नारायण सुवेदी र राजकुमार श्रेष्ठले सहजिकरण गर्नु भएको छ ।

कार्यक्रममा प्रयास नेपाल धादिङ र आड्रा नेपालको संस्थागत चिनारी र परियोजनाको लक्ष्य, उदेश्य संचालन प्रक्रिया र मुख्य क्रियाकलापहरुको बारेमा प्रयास नेपाल धादिङका पशुस्वास्थ्य प्राविधिक रुपेश तामाङ, जेण्डर एसोसपयट शर्मिला गुरुङ, पदम खत्री,कविता सापकोटाले जानकारी गराउनु भएको थियोे । कृषकको क्षमता विकास, जलवायु कृषक पाठशाला, प्राविधिक ज्ञान, सिप हस्तान्तरण गरी कृषि तथा पशुपालनमा उत्पादन र उत्पादकत्व बृद्धिमा टेवा पुर्याउने उदेश्यले धादिङ जिल्लाका खनियावास र गंगाजमुना गाउँपालिकामा उत्थानशील जिविकोपार्जन तथा खाद्य सुरक्षा सुढृढिकरण परियोजना संचालन गरिएको प्रयास नेपाल धादिङका कार्यकारी निर्देशक दामोदर अर्यालले बताउनु भयो ।

खनियास गाउँपालिकामा ३२ र गंगाजमुना गाउँपालिकामा ४८ गरी ८० वटा कृषक समुहहरु मार्फत परियोजनाले कृषि तथा पशुपालन क्षेत्रमा कार्य गरिरहेको गुम्दीबाट प्रयास नेपाल धादिङका जेण्डर एसोसिएट शर्मिला गुरुङले जानकारी दिनु भयो ।