खाल्टेमा जारी श्रीमद भागवत सप्ताहको आज पाँचौँ दिन,प्राविधिक विद्यालय स्थापना गर्नको लागि चन्दा संकलन हुदैँ

धादिङ,४ मंसिर
नीलकण्ठ नगरपालिका वडा नम्बर ५ खाल्टेमा सुरु भएको श्रीमद् भागवत सप्ताह धनधान्याञ्चल बिराट ज्ञान महायज्ञ एवम् शैक्षिक तथा धार्मिक महामहोत्सव जारी रहेको छ । महायज्ञको मंगलबार(आज) पाँचौँ दिन विभिन्न दानवीरहरुबाट नगद संकलन भएको छ ।खाल्टे देउरालीमा अवस्थित श्री मनकामना देवी आधारभूत विद्यालयमा प्राविधिक शिक्षालयको स्थापना एवम् शैक्षिक उन्नयन गर्ने उद्देश्यले यहि कात्तिक २९ गतेदेखि सुरु भएको महोत्सवमा जिल्ला भित्र तथा बाहिरबाट दान संकलन भईरहेको मुल आयोजक समितिका संयोजक हस्त बहादुर मगरले जानकारी दिनुभयो ।

सप्ताहको छैटौँ दिन आज नेपाली काँग्रेसका युवा नेता तथा नेपाल नगरपालिका संघका सल्लाहकार सरोज अधिकारीको प्रमुख आतिथ्यतामा सम्पन्न भएको छ ।कार्यक्रममा नीलकण्ठ नगरपालिकाका सल्लाहकार तथा नेपाली काँग्रेसका युवा नेता दिपक कोईरालाको विशेष आतिथ्यता रहेको थियो । कार्यक्रममा शिक्षक संघका नेता शिवहरि अधिकारी,काँग्रेसका नेताहरु तिलक ढुंगाना,प्रकाश ढुंगाना,शिवहरी अधिकारी,शिक्षक रमेश श्रेष्ठ र नेपाली काँग्रेसका नगर समितिका सदस्य नारायण श्रेष्ठ लगायतको आतिथ्यता रहेको थियो ।

महोत्सवबाट विद्यालयमा गुणस्तरिय शिक्षामा सहयोग पुग्ने अपेक्षा गरिएको विद्यालय व्यवस्थापन समितिका अध्यक्ष प्रकाश बहादुर मगरले जानकरी दिनुभयो ।श्रीमद् भागवत सप्ताह धनधान्याञ्चल बिराट ज्ञान महायज्ञ कार्यक्रममा शुभकामना मन्तव्य दिनुहुदै प्रमुख अतिथी सरोज अधिकारीले खाल्टेका नागरिकहरुको सुख दुखमा आफुले साथ दिने बताउनुभयो।शैक्षिक गुणस्तर बृद्धि गर्न र प्राविधिक विद्यालय स्थापनाको लागि आफुले सहयोग गर्ने बताउनुभयो।आफु प्रदेश,संघ वा जुनसुकै स्थानमा जानुपर्ने र सहजिकरण गर्नपरेपनि तयार रहेको बताउनुभयो ।

यसैगरी कार्यक्रममा विशेष अतिथी दिपक कोईरालाले प्राविधिक विद्यालयको स्थापनाको लागि आफुले सहयोग गर्ने भन्दै उहाँले शैक्षिक विकासमा आफुले सहयोग गर्ने बताउनुभयो ।‘पण्डित श्री विजय सिग्देलको मुखारविन्दुबाट कथा वाचन भईरहेको उक्त सप्ताहमा कलाकारहरुको समेत बेजोड प्रस्तुती भईरहेको भागवत संयोजक कपिल भट्टले जानकारी दिनुभयो ।