फुलखर्क–मजुवामा माघ १ गते लिःल (घले) ल्होसर तथा बृहत् सांस्कृतिक कार्यक्रम

धादिङ,२१ पुष ।
धादिङको गंगाजमुना गाउँपालिका–५ फुलखर्क–मजुवामा माघ १ गते लिः ल (घले) ल्होसर तथा बृहत् सांस्कृतिक कार्यक्रम आयोजना गरिने भएको छ। घले समुदायको सांस्कृतिक पहिचान प्रवद्र्धन गर्ने उद्देश्यले भव्य रुपमा कार्यक्रम गर्न लागिएको लिः ल गंगाजमुना गाउँपालिका मूल ल्होसर आयोजक कमिटिका प्रचार प्रसार समितिका संयोजक केशर घलेले बताउनुभयो ।

कार्यक्रमको मुख्य आकर्षणका रूपमा राष्ट्रिय स्तरका चर्चित कलाकारहरू गायिका पूर्णकला बि.सी, बिन्दा परियार, रिया गुरुङ, गायक रेशम निर्दोष, सुनिल गिरी, हास्य कलाकार सन्ध्या बुढा (काउली बुढी), मोडल तथा डान्सर रुपा एस घले, ननिता हिमरुङ र नायक गणेश मान घलेजस्ता कलाकारहरूको प्रस्तुति समावेश गरिएको छ। साथै, घले नृत्य समूहका रमिता घले, सम्झना घले, ज्योति घले, पुष्पञ्जली घले र सिर्जना घलेद्वारा विशेष नृत्य प्रदर्शन गरिनेछ।

कार्यक्रमको अर्को विशेष आकर्षण खुल्ला भलिबल प्रतियोगिता हुनेछ, जसमा प्रथम स्थान प्राप्त गर्ने टिमले रु ४०,०००, ट्रफी, मेडल र प्रमाण–पत्र प्राप्त गर्नेछन्। द्वितीय र तृतीय स्थानका लागि क्रमशः रु ३०,००० र रु २०,००० को पुरस्कारसहित ट्रफी, मेडल र प्रमाण–पत्र प्रदान गरिन संयोजक घलेले जानकारी दिनुभयो ।

घलेका अनुसार प्रतियोगितामा सहभागी हुन इच्छुक खेलाडीहरूले टिम दर्ता शुल्क रु ३५०० तिर्नुपर्नेछ भने दर्ता अन्तिम मिति पौष २५ गते साँझ ४ बजेसम्म तोकिएको छ। टिम दर्ताका लागि ९८६५३८७६६७, ९७०६१०४५३४, ९७४१८९०००४ र ९८६४६०५४३२ नम्बरमा सम्पर्क गर्न सकिनेछ।

कार्यक्रम बिहान ११ बजे प्रमुख अतिथिको उपस्थितिमा उद्घघाटन गरिनेछ। कलाकारहरूद्वारा लाइभ दोहोरी गीत, ठाडो भाका, कौडा सालैजो गीत, र उत्कृष्ट नृत्य प्रदर्शन गरिनेछ।

साथै, घले समुदायको परम्परागत ¥यालिका, स्थानिय लामा नाच, झाँक्री नाच, मारुनी नाच, र अन्य झाँकीहरू प्रदर्शन गरिनेछन्। आयोजकका अनुसार कार्यक्रमको समापनमा विजयी खेलाडीहरूलाई पुरस्कार वितरण र सहयोगी संस्थाहरूलाई सम्मान–पत्र प्रदान गरिने छ ।

यस ऐतिहासिक र सांस्कृतिक महत्वको कार्यक्रमलाई भव्य रूपमा सफल बनाउन सबैलाई सहभागिताका लागि लिः ल गंगाजमुना गाउँपालिका मूल ल्होसर आयोजक कमिटिले हार्दिक अनुरोध गरेको छ ।