विद्यार्थीलाई पढाईमा उत्प्रेरणा होस भनेर व्यक्तिगत खर्चले पुरस्कृत गर्दै वडा अध्यक्ष भण्डारी

धादिङ,२८ पुस
नीलकण्ठ नगरपालिका वडा नम्बर १२ का वडा अध्यक्ष धर्मराज भण्डारी(राजकुमार)ले व्यक्तिगत रकमबाट वडा भित्रका विद्यार्थीहरुलाई पुरस्कृत गर्दै आईरहनुभएको छ। वडाको शिक्षा सुधारको लागि विद्यार्थीहरुलाई पढ्नमा उत्प्रेरणा होस भनेर पुरस्कार दिईएको अध्यक्ष भण्डारीले नीलकण्ठ एफएमलाई जानकारी दिनुभयो ।विद्यालय मनोपरामर्श कार्यक्रममा उत्कृष्ट अंक ल्याउने विद्यार्थीहरुलाई व्यक्तिगत नगद सहित पुरस्कार दिने घोषणा गर्नुभएका भण्डारीले शनिवार एक कार्यक्रमका बिच पुरस्कार वितरण गर्नुभएको हो ।वडा भित्रको शिक्षा सुधारको लागि वडा अध्यक्ष भण्डारीले वडा भित्रका विद्यालयहरुमा घुम्ती बैठक,अन्तर विद्यालय भ्रमण,अन्तर विद्यालय सिकाई आदान प्रदान लगायत विद्यार्थीहरुको तनाव व्यवस्थापन र सकारात्मक सोच अभिबृद्धिको लागि विद्यालय मनोपरामर्श सन्चालन गर्दै आईरहनुभएको छ ।

विद्यार्थीहरुको अन्तरनिहित क्षमता प्रफुष्टन गर्ने उदेश्यले विभिन्न अतिरिक्त कार्यक्रम सन्चालन गर्दै आईरहनु भएको छ । शनिवार सांकोष माविको ६२ औँ बार्षिक उत्सवको अवसर पारेर एसइईमा उत्कृष्ट अंक ल्याउने विद्यार्थीहरुलाई नगद ३ हजार र प्रमाणपत्रबाट पुरस्कृत गर्नुभएको हो ।साथै उहाँले नगर स्तरी राष्ट्रपति रनिङ शिल्ड प्रतियोगितामा स्वर्ण पदक विजेतालाई नगद एक हजार,कास्य र रजत पदक विजेतालाई नगद ५ सय पुरस्कृत गर्नुभएको थियो । विद्यार्थीहरुलाई पढ्ने बानिमा प्रतिस्पर्धा होस र अतिरिक्त क्रियाकलापमा सहभागीता बढाउनको लागि व्यक्तिगत खर्च गरेर भएर पनि हौसला स्वरुप पुरस्कार वितरण गरिएको भण्डारीले बताउनुभयो।

बालबालिकाहरुलाई हौसला,उत्प्रेरणा र मायाँको आवश्यकता रहेको भन्दै उहाँले आफु बालबालिकाहरुको समस्या समाधान गर्नको लागि तयार रहेको बताउनुभयो । विद्यालय व्यवस्थपन समितिका अध्यक्ष एवं नेपाली काँग्रेसका क्षेत्रीय सभापति राकेश धमलाको अध्यक्षतामा सम्पन्न भएको कार्यक्रममा बागमती प्रदेशका सामाजिक विकास मन्त्री हरि प्रभा खड्गीको प्रमुख आतिथ्यता रहेको थियो । नेपाली काँग्रेसका पुर्व सभापति रमेश धमलाको विशेष आतिथ्यता रहेको कार्यक्रममा सिद्धलेक गाउँपालिकाका अध्यक्ष परशुराम खतिवडा,प्रदेश सभापति होम गुरुङ,वडा अध्यक्ष धर्मराज भण्डारी(राजकुमार) लगायतको आतिथ्यता रहेको थियो ।