गाउँपालिका भित्र बन्ने नयाँ संरचनाहरुमा अपाङ्गमैत्री बनाईन्छ : अध्यक्ष दनै

धादिङ,१५ फागुन

ज्वालामुखी गाउपालिकाका अध्यक्ष यमनाथ दनैले गाउँपालिका भित्र बन्ने नयाँ संरचनाहरुमा अपाङ्गमैत्री बनाईने बताउनु भएको छ । गाउपालिकामा संचालित अपाङगता सम्बन्धि अभिमुखीकरण कार्यक्रमलाई सम्बोधन गर्दै उहाँले सो कुरा बताउनु भएको हो ।
समुदायमा आधारित पुनःस्थापना कार्यक्रम अन्तरर्गत ज्वालामुखी गाउँपालिकामा अपाङ्गता भएका व्यक्तिहरु, अपाङग सञ्जालका कार्यालय प्रमुख, निर्वाचित जनप्रतिनिध, अपाङ्गता समन्वय समितिका सदस्हरुलाई अपाङगता सम्बन्धि अभिमुखीकरण कार्यक्रम सम्पन्न भएको छ ।
ज्वालामुखी गाउँपालिकाका उपाध्यक्ष धर्म बहादुर अर्यालको अध्यक्षतामा भएको कार्यक्रममा गाउँपालिकाका अध्यक्ष यमनाथ दनैको प्रमुख आतिथ्यता तथा प्रमुख प्रशासकिय अधिकृत सुमन पण्डितको विषेश आतिथ्यता रहेको थियो ।

कार्यक्रममा अपाङ्गता भएका महिलाहरुको प्रजनन् स्वास्थ्य, अधिकारको विषयमा, कस्ता व्यक्तिलाई अपाङ्गता भनिन्छ, उनीहरुको अधिकार कसरी स्थापित गर्ने, कस्तो व्यक्तिलाई कुन कार्ड वितरण गर्ने, गाउँपालिकाले अपाङ्गता परिचय पत्र वितरण कार्यविधि २०७५ मा व्यवस्था गरिएका कार्यहरुको विषयमा छलफल भएको थियो ।कार्यक्रममा बोल्नुहुँदै गाउँपालिका अध्यक्ष यमनाथ दनैले अपाङगता भएका क्षेत्रमा प्रतिनिधिमुलक पात्रहरुको लागि कार्यक्रम गरिएको र आगामी दिनहरुमा सबैको पहुँचमा हुनुपर्ने बताउनुभयो । उहाँले गाउँपालिका भित्र अब बन्ने नयाँ संरचनाहरुमा अपाङ्गमैत्री बनाउने प्रतिबद्धता व्यक्त गर्नुभयो ।

त्यस्तै उपाध्यक्ष धर्म बहादुर अर्यालले अपाङ्गता भएका व्यक्तिहरु सबैले कार्ड नपाएका हुँदा समुदाय स्तरमा कसरी वितरण गर्न सकिन्छ भन्ने विषयमा ध्यान दिन आग्रह गर्नुभयो ।कार्यक्रममा अपाङ्गता भएका महिलाहरुको प्रजनन् स्वास्थ्य सम्बन्धि स्वास्थ्य शाखा प्रमुख सुजन श्रेष्ठ, अपाङ्गताको अधिकारको विषयमा अपाङ्ग कल्याड संघ धादिङका अध्यक्ष गुणराज खतिवडा र अपाङ्गता परिचय पत्र वितरण कार्यविधि २०७५ को विषयमा महिला तथा जेष्ठ नागरीक शाखा प्रमुख ज्ञानु कडेलले सहजीकरण गर्नुभएको थियो ।

गाउँपालिका भित्रका अपाङ्गता क्षेत्रका सरोकारहरु सबैलाई अपाङ्गता सम्बन्धमा भएको व्यवस्थाहरुको विषयमा जानकारी गराउने उद्धेश्य र अपाङ्गता भएका व्यक्तिहरुलाई पनि अन्य व्यक्ति सरह अधिकार प्राप्त गर्ने सक्ने बनाउने उद्धेश्यले कार्यक्रमको आयोजना गरिएको थियोे ।
कार्यक्रममा प्रहरी, अपाङ्गताको क्षेत्रमा काम गर्ने संघ संस्था, अपाङग सन्जाल, अपाङ्गता भएका व्यक्तिहरु लगायतको उपस्थिति रहेको थियो । अभिमुखीकरण कार्यक्रममा ३५ जनाको सहभागिता रहेको थियो ।