मानसिक स्वास्थ्य र मनोविमर्शमा वडाको चासो

धादिङ, ११ चैत ।
एक दिने धुमपान तथा मध्यपानबाट हुने मानसिक तथा स्वास्थ्य समस्या साथै मनोविमर्श सम्बन्धी अभिमुखिकरण कार्यक्रम रिजाल डाँडामा सम्पन्न भएको छ ।
नीलकण्ठ नगरपालिका वडा नं.१२ को आयोजनामा सम्पन्न भएको उक्त कार्यक्रममा वडाभित्रका ७० जना नागरिक सहभागिता रहेको थियो ।वडा अध्यक्ष धर्मराज भण्डारी राजकुमारको अध्यक्षतामा सम्पन्न भएको कार्यक्रममा नीलकण्ठ नगरपालिकाका उपप्रमुख दिपक विश्वकर्माको प्रमुख आतिथ्यता रहेको थियो ।

कार्यक्रमलाई सम्बोधन गर्दै प्रमुख अतिथि विश्वकर्माले धुमपान मध्यमान लगायत गलत व्यवहारले शारिरीक तथा मानसिक असर परेको भन्दै त्यसको न्युनिकरणको लागि नगरपालिकाले कार्यक्रम संचालन गरेको बताउनुभयो ।मानसिक स्वास्थ्यको क्षेत्रमा नगरपालिकाले समस्या भएका नगरबासीको घरमै गएर मनोपरामर्श दिइरहेको भन्दै तनावलाई व्यवस्थापन गर्न सके मात्रै सुखी र खुशी हुन सकिने बताउनुभयो । कार्यक्रममा वडा अध्यक्ष भण्डारीले वडाबासीको व्यवहारमा परिवर्तन गराउनको लागि यस्तो कार्यक्रम गरिएको बताउनुभयो ।

भौतिक विकासमात्रै गरेर नहुनेभन्दै चेतनास्तर वृद्धिको लागि पनि काम गर्नुपर्ने बताउनुभयो ।कार्यक्रममा सहजकर्ता तथा वरिष्ठ जनस्वास्थ्य अधिकृत विष्णुप्रसाद रिजालले धुमपान र मध्यपानबाट हुने शारिरीक असर,नसर्ने रोग र सर्ने रोगको के हो?नसर्ने रोग र सर्ने रोगबाट कसरी बच्ने,पोषण के हो? लगायत स्वास्थ्य समस्याको बारेमा जानकारी गराउनु भएको थियो ।कार्यक्रममा नीलकण्ठ नगरपालिकाका मनोसामाजिक परामर्शकर्ता रामकुमार थापाले मनोसामाजिक समस्या भनेको के हो?मनोसामाजिक र मनोबैज्ञानिक कारण के हो, मनोसामाजिक समस्या हुनुको कारण,यसको लक्षण,तनाव व्यवस्थापन कसरी गर्ने र बालबालिकाहरुलाई सकारात्मक व्यवहार कसरी गर्ने भन्ने विषयमा सहजिकरण गर्नुभएको थियो ।