नीलकण्ठ नगरपालिकामा ‘विद्यार्थीसँग मेयर’ सञ्चालन हुने

नीलकण्ठ नगरपालिका भित्रका विद्यालयमा अब नगर प्रमुख र विद्यार्थीबिच अन्तरक्रियात्मक कार्यक्रम ‘विद्यार्थीसँग मेयर’ सञ्चालन हुने भएको छ । मंगलबार धादिङबेसीमा आयोजित एक कार्यक्रमलाई सम्बोधन गर्दै नीलकण्ठ नगरपालिकाका प्रमुख भिम प्रसाद ढुङ्गानाले नगरभित्रका सबै विद्यालयका विद्यार्थीहरुका अवस्था बुझ्नका लागि यस्तो कार्यक्रम गर्न लागेको बताउनु भयो ।

मंगलबार धादिङबेसीमा आयोजित नगरपालिका भित्रका विद्यालयका प्रधानाध्यापकहरुको बैठकमा सम्बोधन गर्दै नगर प्रमुख ढुङ्गानाले पालिका भित्रका सबै विद्यालयमा पुगेर विद्यार्थीहरुसंग अन्तरक्रियात्मक कार्यक्रम गर्ने बताउनुभयो ।

‘स्थानीय निकायले विद्यालय र विद्यार्थीहरुका लागि के कसरी कार्य गरेको छ, सो का बारेमा जानकारी गराउने मात्र नभई आगामी दिनमा विद्यार्थीहरुको हितका लागि स्थानीय निकायले के कस्ता कार्य गर्न सकिन्छ भन्ने बारेमा पनि उनीहरुसंग नै छलफल गर्ने हाम्रो उद्देश्य हो ।’

​

नगरप्रमुख ढुङ्गानाले भन्नुभयो, ‘एकातर्फ यसले विद्यार्थीको समस्या प्रत्यक्ष रुपमा बुझ्न सकिन्छ भने अर्कातर्फ स्थानीय सरकार प्रति विद्यार्थीको सकारात्मक धारणा बसाल्न सहयोग पुग्छ ।’

विद्यालयको पाठ्यपुस्तकमा स्थानीय निकाय, यसको गठन प्रक्रिया देखि काम, कर्तव्य र अधिकार समेत पठनपाठन हुने गरेको स्मरण गर्दै नगर प्रमुख ढुङ्गानाले यसरी गरिने अन्तरक्रियात्मक कार्यक्रमबाट विद्यार्थीले व्यवहारिक ज्ञान हासिल गर्न सहयोग पुग्ने विश्वास व्यक्त गर्नुभयो । सुरुवाती चरणमा माध्यमिक तहका विद्यालयबाट सुरु हुने ‘विद्यार्थीसंग मेयर कार्यक्रम’ बिस्तारित रुपमा पालिका भित्रका सबै विद्यालयका विद्यार्थीमाझ पु¥याइने नगरप्रमुख ढुङ्गानाको भनाई छ ।

अर्काे फरक प्रसंगमा नगर प्रमुख ढुङ्गानाले विद्यालयको शैक्षिक गुणस्तर विकासका लागि नगरपालिकाबाट कुनैपनि कसर बाँकी नराखिने बताउँदै सम्पूर्ण प्रधानाध्यापक तथा शिक्षकहरुले आ–आफ्नो कार्यक्षेत्रमा इमान्दार भएर जिम्मेवारी निभाउन आग्रह गर्नुभयो। विद्यालयको भौतिक सुधार देखि शिक्षकहरुको क्षमता अभिवृद्धिका लागि पालिकाबाट विभिन्न शीर्षकमा बजेटहरु उपलब्ध गराइएको र सो को सदुपयोग गर्न पनि प्रमुख ढुङ्गानाले आग्रह गर्नुभयो ।

नीलकण्ठ नगरपालिकाबाट पालिका भित्रका विद्यालयका बालविकास कक्षा व्यवस्थापनलाई प्रविधिमैत्री बनाउनका लागि स्मार्ट टि.भी. प्रदान गरिदैछ भने ‘एक शिक्षक, एक ल्यापटप’ को अवधारणा अनुसार पहिलो चरणमा २ सय भन्दा बढी शिक्षकलाई ५० प्रतिशत साझेदारीमा नगरपालिकाले ल्यापटप प्रदान गर्न लागेको छ ।

​

कार्यक्रममा नीलकण्ठ नगरपालिकाबाट गत वर्ष लगिएको प्रधानाध्यापकहरुको शैक्षिक अवलोकन भ्रमणका बारेमा समिक्षा गरिएको थियो । यसका साथै पालिका स्तरीय अन्तरविद्यालय खेलकुद प्रतियोगिता, अतिरिक्त क्रियाकलाप सञ्चालनका बारेमा प्रधानाध्यापकहरुको सुझाव संकलन गरिएको छ ।

कार्यक्रमबाट प्राप्त सुझावका आधारमा यही चैत्र मसान्त भित्र विभिन्न चरणमा पालिकास्तरीय अतिरिक्त क्रियाकलाप तथा खेलकुद प्रतियोगिता सञ्चालन गरिने नीलकण्ठ नगरपालिका शिक्षा शाखाका स्रोतव्यक्ति मेघनाथ कोइरालाले नीलकण्ठ एफ.एमलाई जानकारी दिनुभयो । कार्यक्रममा एकिकृत शैक्षिक व्यवस्थापन सूचना प्रणाली IEMIS का बारेमा समेत छलफल भएको थियो ।

​

प्रधानाध्यापकको बैठकमा पालिका भित्रका ९० वटा सामुदायिक तथा संस्थागत विद्यालयका प्रधानाध्यापकहरुको सहभागिता रहेको थियो । कार्यक्रममा धादिङका स्रष्टा साहित्यकार बद्री प्रसाद दाहालले भर्खरै बजारमा आएको आफ्नो दुइ पुस्तकहरु छन्द कविता संग्रह सयपत्री र निबन्ध संग्रह माला चिन्तनको परिचर्चा समेत गर्नु भएको थियो । नीलकण्ठ नगरपालिकाका शिक्षा, यूवा तथा खेलकुद शाखा प्रमुख तुल बहादुर महतको अध्यक्षतामा भएको कार्यक्रम स्रोतव्यक्ति मेघनाथ कोइरालाले सञ्चालन गर्नुुभएको थियो ।

​

​