गंगाजमुना गाउँपालिकामा विभिन्न कार्यक्रम गरी मनाईदै लैंगिक हिंसा विरुद्धको १६ दिने अभियान

धादिङ,१९ मंसिर ।
लैंगिक हिंसा विरुद्वको विश्वव्यापी १६ दिने अभियान अन्तरगत उत्तरी धादिङको गंगाजमुना गाउँपालिकामा विभिन्न कार्यक्रम मनाईदै छ । नोभेम्बर २५ तारिखलाई महिला हिंसा निर्मूलसम्बन्धी अन्तर्राष्ट्रिय दिवसको रूपमा विश्वभर मनाउने निर्णय गरेबमोजिम नोभेम्बर २५ देखि डिसेम्बर १० सम्म विश्वभर लैंगिक हिंसा विरूद्धको १६ दिने अभियान समेत सन्चालन हुँदै आएको छ ।

’लैंगिक हिंसा अन्त्यको सुनिश्चितता, महिला र बालबालिकामा लगानीको ऐक्यबद्धता’ भन्ने राष्ट्रिय नाराका साथ गंगाजमुना गाउँपालिकामा वडा स्तरमा विभिन्न सचेतना मुलक कार्यक्रम गरी मनाईएको छ । महिला बालबालिका तथा जेष्ठ नागरिक शाखाको आयोजनामा विद्यालय स्तरमा सचेतना,अन्तरक्रिया तथा प्रभातफेरी आयोजना गरी दिवस मनाईएको महिला बालबालिका तथा जेष्ठ नागरिक शाखाका प्रतिमा भट्टले जानकारी दिनुभयो ।

गाउँपालिकाका अध्यक्ष भक्त बहादुर लामाको अध्यक्षतामा प्रभातफेरी सहित कानुनी सचेतना तथा अन्तरक्रिया कार्यक्रम सम्पन्न भएको छ । गाउँपालिकाका उपाध्यक्ष एवं अपांगता समन्वय समितिका संयोजक रामेश्वर सिम्खडाको विषेश आतिथ्यता रहेको कार्यक्रममा गंगाजमुना गाउँपालिकाका प्रमुख प्रशासकीय अधिकृत अनिल श्रेष्ठ, वडा अध्यक्षहरु,कार्यपालिका सदस्य तथा वडा सदस्यहरुको सहभागिता आतिथ्थयता रहेको थियो । १६ दिन भित्र पर्ने विभिन्न दिवसहरुमा गाउँपालिकाले वडा स्तरमा विभिन्न कार्यक्रम सन्चालन गरीरहेको छ ।