२ करोड १९ लाखको बजेट बिनियोजन गदै ज्वालामुखी गाउँपालिकाको बाह्रौँ हिउदे अधिवेशन सकियो

धादिङबेशी । ज्वालामुखी गाउँपालिकाको बाह्रौँ गाउँ सभा तथा हिउदे अधिवेशन सम्पन्न भएको छ । बिहिबार गाउँपालिकाको कार्यालयमा साँध भन्ज्यांङमा हिउदे अधिवेसन सम्पन्न भएको हो ।

गाउँ सभामा चालू आर्थिक बर्ष २०८०/०८१ को बार्षिक खर्च सम्बन्धी छलफल भएको छ । साथै गाउँसभामा अहिले सम्म भएका कामहरुको समिक्षा तथा अब सम्पन्न गरिने कामहरुको बारेमा छलफल,बजेट रकमान्तर, बजेट विवरण हेरफेर लगायतका बारेमा समेत छलफल पश्चात विभिन्न निर्णय भएको गाउँपालिकाका अध्यक्ष यमनाथ दनैले जानकारी दिनुभयो ।

गाउँपालिका अध्यक्ष यमनाथ दनैको अध्यक्षतामा सम्पन्न गाउँसभामा गाउँपालिका तथा वडा कार्यालयबाट सम्पन्न भएका तथा सम्पन्न हुन बाँकी कामहरुको बारेमा वडा अध्यक्षहरुले आ–आफ्नो धारण राख्नु भएको थियो ।

बजेट कसरी कार्यान्वयन गर्ने तथा सम्पन्न कामहरु र गाउपालिकाको गतिबिधी बारे सभामा छलफल भएको थियो । सभामा उठेका प्रश्नहरुको जवाफदिदै गाउँपालिका अध्यक्ष यमनाथ दनैले हालसम्म भएका कामहरु सन्तोषजनक तरिकाले सम्पन्न भएको बताउनुभयो ।

गाउँपालिका भित्र भएका योजनाहरुको धमाधम काम भईरहेको भन्दै समयमै सक्ने गरी सबैको निगरानी आवश्यकता रहेको बताउनुभयो । विभिन्न क्षेत्रमा बिनियोजित गरिएको बजेट चाडै कार्यान्वयनमा आउने अध्यक्ष दनैले बताउनुभयो ।

कार्यक्रममा गाउँपालिकाका उपाध्यक्ष धर्म अर्यालले आर्थिक बर्ष ०८०/०८१ को बजेट प्रस्तुत गर्नुभएको थियो । अर्यालले हालसम्म कुनै पनि निकायबाट पुरक (समपुरक, विशेष अनुदान,निर्वाचन क्षेत्र विकास कार्यक्रम, पुर्वाधार विकास कार्यक्रम अन्तर्गत) बजेट उपलब्ध नभएको बताउनुभयो ।

उहाँले यस सभा पछि कुनै स्रोतबाट बजेट प्राप्त भएमा गाउँकार्यपालिकाको बैठकको निर्णय तथा बाह्रौँ हिउँदे सभा अनुसार हुने जानकारी गराउनुभएको थियो । हिउँदे अधिवेशनबाट २ करोड १९ लाख रुपैँया बिनियोजन गरीएको छ ।