धादिङमा आफ्नै छोरी बलात्कार गर्ने ४९ बर्षिय बाबु पक्राउ

धादिङबेशी । धादिङमा १६ वर्षीया छोरी बलात्कार गर्ने ४९ वर्षीय बाबुलाई इलाका प्रहरी कार्यालय गजुरीले पक्राउ गरेको छ ।
पटक पटक बलात्कार गर्ने गरेका बाबु विरुद्ध पीडितपक्षले असार १६ गते इलाका प्रहरी कार्यालय गजुरीमा उजुरी दिएपछि पक्राउ गरिएको    हो ।

प्रहरीले असार १६ गते मुद्दा दर्ता गरि आरोपितलाई खोजि गरेको थियो । पीडितको जिल्ला अस्पतालमा गरेको स्वास्थ्य परिक्षणले १९ हप्ताको गर्भ रहेको स्वास्थ्य परिक्षणबाट जानकारी भएको थियो । जिल्ला अदालतको आदेशले पीडितको स्वास्थ्य परिक्षण र उपचार प्रसुति गृह काठमाण्डौमा असार १७ गतेदेखि २२ गतेसम्म भएको थियो । अदालतको स्वकृति पछि पीडितको गर्भपतन समेत प्रसुति गृह काठमाडौंमा गरिएको छ ।

आरोपितलाई पक्राउ गरि अदालतको अनुमतिले हिरासतमा राखेको छ । पीडित अस्पतालको उपचारपछि आमासंग आफ्नो घर पुगेपछि परिवारका अन्य सदस्यको धम्कीका कारण घरमा बस्न नसकी असार २३ गतेदेखि सुरक्षित आवास गृहमा राखिएको र एकिकृत संकट व्यवस्थापन प्रणालीबाट उपचार लगायतका न्यायिक सहयोग भइरहेको बताईएको छ ।